Job 8

Bildadi Anasema: Yampasa Ayubu Atubu

1 ^aKisha Bildadi Mshuhi akajibu:
2 ^b“Hata lini wewe utasema mambo kama haya?
Maneno yako ni kama upepo mkuu.

3 ^cJe, Mungu hupotosha hukumu?
Je, Mwenyezi hupotosha kile kilicho haki?

4 ^dWatoto wako walipomtenda dhambi,
aliwapa adhabu ya dhambi yao.

5 ^eLakini ukimtafuta Mungu,
nawe ukamsihi Mwenyezi,

6 ^fikiwa wewe ni safi na mnyofu,
hata sasa atainuka mwenyewe kwa niaba yako,
na kukurudisha katika mahali pako pa haki.

7 ^gIjapokuwa mwanzo wako ulikuwa mdogo,
lakini mwisho wako utakuwa wa mafanikio.

8 ^h“Ukaulize vizazi vilivyotangulia
na uone baba zao walijifunza nini,

9 ⁱkwa kuwa sisi tumezaliwa jana tu na hatujui lolote,
nazo siku zetu duniani ni kama kivuli tu.

10 ^jJe, hawatakufundisha na kukueleza?
Je, hawataleta maneno kutoka kwenye kufahamu kwao?

11 ^kJe, mafunjo yaweza kumea mahali pasipo na matope?
Matete yaweza kustawi bila maji?

12 ^lWakati bado yanaendelea kukua kabla ya kukatwa,
hunyauka haraka kuliko majani mengine.

13 ^mHuu ndio mwisho wa watu wote wanaomsahau Mungu;
vivyo hivyo matumaini ya wasiomjali Mungu huangamia.

14 ⁿLile analolitumainia huvunjika upesi;
lile analolitegemea ni utando wa buibui.

15 ^oHuutegemea utando wake, lakini hausimami;
huung’ang’ania, lakini haudumu.

16 ^pYeye ni kama mti ulionyeshewa vizuri wakati wa jua,
ukieneza machipukizi yake bustanini;

17 huifunganisha mizizi yake kwenye lundo la mawe,
na kutafuta nafasi katikati ya mawe.

18 ^qUnapong’olewa kutoka mahali pake,
ndipo mahali pale huukana na kusema,
‘Mimi kamwe sikukuona.’

19 ^rHakika uhai wake hunyauka,
na kutoka udongoni mimea mingine huota.

20 ^s“Hakika Mungu hamkatai mtu asiye na hatia,
wala kuitia nguvu mikono ya mtenda mabaya.

21 ^tBado atakijaza kinywa chako na kicheko,
na midomo yako na kelele za shangwe.

22 ^uAdui zako watavikwa aibu,
nazo hema za waovu hazitakuwepo tena.”